Само со човечка сплотеност и единство може да се променат работите во Пехчево, и во Пехчево да се врати животот, истакна вечерва на предизборниот митинг од оваа малешевска општина претседателот на СДСМ, Зоран Заев.
– Пехчево должи повеќе од еден милион евра и е срам и понижување за целиот регион. Но, нема нешто што не можеме да го промениме кон подобро, со човечка сила, сплотеност и единствено, Пехчево може повторно да го направиме да блеска, онака како што го знаеме, со џагорот на среќата, со градењето на пријателствата, дружбата меѓу луѓето, но, за жал тоа сето е изгубено, истакна Заев.
Тој ги потенцираше мерките преземени од Владата кои носат повеќе пари кај граѓаните и најавуваат подобар живот за сите граѓани, како и мерките за поддршка на стопанството.
Кандидатот за градоначалник на Пехчево од СДСМ, Драган Тренчовски, денеска вети пред граѓаните дека Пехчево ќе се гради плански.
– Ќе градиме локални и регионални патишта, ќе го решиме долгогодишниот проблем со водоснабдувањето, ќе обезбедиме приклучоци до сите домаќинства на реконструираната водоводна мрежа, со што ќе се подобри квалитетот на водата за пиење.
– Почитувани граѓани, пред десетина месеци вие со пенкало и глас, на демократски и достоинствен начин, ставивте крај на десетгодишното владеење на една недемократска власт и со тоа ги донесовте демократските промени во Македонија. Пред нас е нов предизвик. На претстојните локални избори, со заокружување на бројот 19 ќе придонесете кон промените во нашата општина, истакна Тренчовски.
На вечерашниот митинг во Пехчево беа претставени и кандидатите за членови на општинскиот Совет, а пред присутните свое обраќање имаше и Николчо Јовчев, носител на листата на советници од СДСМ и коалицијата.
Премиерот Заев пред почетокот на митингот во Пехчево имаше средба со граѓани во центарот на градот.