Претстојните локални избори се многу важни бидејќи работата на општините допира до потребите на секое семејство и затоа на 15 октомври потребно е да се заврши процесот кој започна и промените да се заокружат и на локално ниво, порача претседателот на СДСМ на вечерашниот митинг на СДСМ и коалицијата во Пехчево.
„Општините ќе стануваат се позначајни, бидејќи власта треба што повеќе да се доближи до граѓаните, а месните и урбаните заедници повторно ќе станат правни субјекти кои ќе одлучуваат на микро ниво. Под надлежност на општините се училиштата, градинките и урбанизмот, а во иднина ќе има и нови надлежности како што се социјалната и здравствена заштита. Затоа е важно на локалните избори да се дозаврши започнатиот процес, бидејќи без општините, перспективите за подобар живот во Македонија нема да бидат целосни“ порача Заев.
Лидерот на СДСМ истакна дека централната власт во изминативе месеци докажа дека работи посветено и одговорно и дека во соработка со новата локална власт преку сериозни проекти ќе се обезбедат услови за развој на Пехчево и Малешевскиот регион.
„Заедно со новата локална власт ќе работиме за да отвориме нови можности и да му дадеме живот на целиот овој регион. Ќе се реконструира целата водоводна мрежа за подигнување на квалитетот на живот. Ќе се инвестира во целокупната локална и регионална патна инфраструктура, а со цел граѓаните да останат тука и тука да ги гледаат своите перспективи“ порача Заев.
