Оваа посета на Еврокомесарот Хан доаѓа во момент кога Република Македонија се наоѓа во клучна фаза од исполнување на акцискиот план 3-6-9 кој е наш патоказ и трака кон преговорите, изјави Премиерот Зоран Заев по средбата со комесарот Јоханес Хан.
-Нема никакво сомненија откако граѓаните го изразија своето мислење на локалните избори, новата влада да ги одмрзне европските аспирации. Владата има цврста определба за напредување на државата и демократските процеси. Организиравме и спроведовме демократски, фер и професионални локални избори со одобрување од меѓународните набљудувачи, вели Заев.
Премиерот рече дека реформите предвидени со планот 3 6 9 трајно ќе го ослободат медиумскиот простор од било какви персонални и институционални влијанија и финансиска зависност. Тој исто така најави независност и зајакнување на Јавниот радиодифузен сервис и АВМУ.
Заев исто така ги спомна и промените во правосудството односно формирањето на инклузивни работни групи кои подготвија предлог за изменување и дополнување на Законот за укажувачите.
-Реформата во правосудството треба да отвори простор за независна судска власт која ќе ја искорени корупцијата и ќе им ја врати вербата на граѓаните за независно судство. Ќе биде усвоена реформа за правосудството со акциски план согласно Европската комисија. Капацитетите на Народниот правобранител ќе бидат зголемени, рече Заев.
Премиерот информираше и за формирањето на работна група за УБК и надзор на примената на мерките за следење на комуникациите, како и за преземените активности за целосна деполитизација на администрацијата.
Во врска со надворешната политика на земјата, Заев изјави дека интензивно се работи на преговори со соседите, вклучувајќи ја и Грција за проблемот со името.
-Ние ќе испорачаме резултати затоа што овие реформи се за наше добро, но очекуваме и соодветно вреднување од европските институции, рече Заев.
Виктор Јованов