Претседателот на СДСМ, Зоран Заев, денеска, по повод 18 август – Денот на Армијата на Република Македонија, упати честитка до припадниците на АРМ и граѓаните.
„Дозволете ми, во мое лично име и во име на Социјалдемократскиот Сојуз на Македонија, да упатам честитка до сите припадници на АРМ, по повод Денот на Армијата на Република Македонија. Веќе дваесет и една година, АРМ е браникот на одбраната и заштитата на земјава, a со својот професионализам во извршувањето на задачите, нејзините припадници успешно придонесуваат за регионалната безбедност и мир во светот. Сите ним сме им должни неизмерна благодарност за посветеноста во постигнатите успеси внатре и надвор од земјава, со што АРМ е гарант за опстанокот на државата и чинител на мирот и стабилноста“ – се вели во честитката од Заев.
Тој истакнува дека денеска е повеќе од јасно дека АРМ е важен столб на независноста на нашата земја, како и еден од главните фактори во зачувувањето на суверенитетот и интегритетот на Република Македонија.
„На Армијата на Република Македонија ѝ посакувам многу успеси во иднина, секогаш да биде во готовност да го покаже својот капацитет, а со тоа да обезбеди постојан напредок во општеството и да придонесе за афирмација на Република Македонија на меѓународен план. Нека ни е честит Денот на Армијата на Република Македонија.“ – истакна Заев во честитката по повод 18 Август.
