Претседателот на СДСМ Зоран Заев, денеска, во придружба на Дамјан Манчевски, потпретседател на партијата, Миле Зечевиќ, шеф на изборниот штаб и Стевица Јосифовски од правниот комитет на СДСМ, оствари средба со делегација на ОБСЕ, во состав Нина Соумалаинен, шефица на ОБСЕ во Скопје и Џеф Били, раководител на политичкиот оддел.
На средбата беше разговарано за актуелната политичка состојба во светло на локалните избори, како и спроведувањето на реформскиот процес во интерес на граѓаните. Заеднички беше заклучено дека спроведувањето на фер, слободни и регуларни избори ќе има големо влијание врз целокупниот демократски амбиент во државата.
„Како партија, целосно сме подготвени за локалните избори на кои сме убедени дека ќе победиме. Јасно е дека на Македонија и се потребни слободни, фер и демократски избори што одамна ги немала. Во таа насока посветени сме на гаранциите за фер избори. Оттука и бројните одлуки на Владата на Република Македонија со кои изрично се забранува употребата на средства во државна сопственост за партиски цели. Сите носители на јавни функции имаат обврска доследно да ги почитуваат законите“, посочи претседателот Заев.
Во однос на процесот на реформи и работата на Собранието, претседателот Заев истакна дека по победата на СДСМ на локaлните избори, реформите ќе продолжат со засилено темпо, бидејќи очекува да престанат опструкциите во Собранието и дека ВМРО-ДПМНЕ ќе почне да делува конструктивно.
На средбата беше разговарано и за евроинтегративниот процес на државите од регионот.