Денес е историски ден, заедно напишавме историја, рече премиерот Зоран Заев на прес-конференција по гласањето во Собранието за пристапување кон уставни измени.
– Денес со двотретинско мнозинство зачекоривме кон западните сојузи. Македонија ќе биде дел од ЕУ и НАТО. Со оваа историска одлука нашиот пристап во НАТО ќе продолжи и догодина ќе почне процесот за ЕУ, рече Заев и се заблагодари на сите пратеници, особено на тие од ВМРО-ДПМНЕ и коалицијата што, како што рече, се ставиле над партиските интереси и покрај притисокот од раководството.
Како што кажа премиерот, граѓаните се горди на ваквото Собрание.
– Бидете сигурни дека како премиер останувам на зборот да ја гарантирам безбедноста. Ја изградивме државотворната коалција. Заедно ќе ги усогласиме амандманите и заедно ќе работиме на национално обединување, рече Заев.
Тој ги повика и пратениците кои денес гласаа против дека вратите се отворени за да се приклучат.
– Водевме транспарентен процес, водевме грижа за пријатна атмосфера. Убеден сум дека ќе се приклучат повеќе од 25 пратеници. Следниот чекор ќе го направиме во поголем број, рече Заев и додаде дека за него сите пратеници се исти и оти никој не е виновен додека не се докаже вина.
– Пораката за помирување охрабри, рече Заев и додаде дека низ работни групи ќе се обиделе да најдат начин за помирување низ собраниските тела.
Како што кажа Заев, имало и други пратеници кои дале поддршка, но вечерва не гласале „За“ и рече оти се надева дека процесот ќе се заврши со поддршка од сите 120 пратеници.