Вработените во Министерството за внатрешни работи повторно немаат здравствено осигурување. Информацијата за А1он ја повтрдија вработени во Министерството.
Си плаќаат приватно се што прават како медицинска интервенција, прегледи, снимки, анализи. Проблемот како и во јуни годинава се јавува некаде на релација МВР-Фонд за здравствено осгурување.
Независниот синдикат на полицијата (НСП) реагира на, како што велат, повторното појавување на проблеми со здравственото осигурување на припадниците на Министерството за внатрешни работи во Фондот за здравствено осигурување на Македонија (ФЗОМ).
Од синдикатот посочуваат дека внимателно ја следат состојбата и оценуваат дека ваквите ситуации се недозволиви, особено кога станува збор за здравственото осигурување на полициските службеници.
„Сметаме дека ваквите ситуации се недозволиви и не смеат да се повторуваат во ФЗОМ, особено кога станува збор за здравственото осигурување на полициските службеници“, велат од НСП.
Синдикатот најави дека во текот на денот ќе достави допис до министерот за внатрешни работи, во кој ќе побара итна интервенција во ФЗОМ.
Целта, според НСП, е проблемот да биде надминат во најкраток можен рок, но и да се обезбеди трајно решение со кое ќе се спречи ваквите ситуации да се повторуваат во иднина.
„НСП останува посветен на заштитата на правата и интересите на припадниците на МВР и ќе продолжи да реагира секогаш кога нивните права се доведени во прашање“, додаваат од синдикатот.