Изутринава во Скопје повторно насилничко однесување и малтретирање животни. Човек со стап пред очевидци и со над 20 удари по главата, безмилосно претепа бездомно куче. А1он дојде до снимката кога кучето влегло во складиште во Момин Поток, а еден од присутните во дворот, за кој се претпоставува дека е сопственикот зема стап и безмилосно удира по кучето.
Според сознанија на А1он, еден од присутните го пријавил настанот во полиција. Од МВР потврдија дека сторителот е приведен и задржан во полициска станица.
Кучето по ваквата агресија и малтретирање било однесено во ветеринарна станица и сè уште е незивесно дали ќе преживее, со оглед на тоа што повредите на главата се сериозни.
Малтретирањето и убивањето животни е кривично дело, регулирано и со Кривичниот законик и со Законот за заштита и благосостојба на животните. Во Македонија тоа е честа појава,. Еден од последните примери беше кучето кое беше натерано да скокне од тераса во Тетово, а речиси секојдневни се примерите на напуштање домашни или пак борени животни кои потоа се наоѓаат на улиците, со што бројката на бездомна популација кучиња сè повеќе расте.
Свеж е и примерот во Дебар Маало, кога среде бел ден кога присутните гости пиеја кафе, а во близина лежеше локалниот миленик, кучето Идриз, влезе човек со секира и до смрт го бодеше беспомошното животно. За ова дело, нему му беше одредена само парична казна.