Водостопанство „Кумановско-липковско поле“ заврши со продлабочување на речното корито на Липковка во општина Липково на потегот од село Липково до село Опае.
Екипите на претпријатието наскоро ќе продолжат со активностите за расчистување на коритото од село Опае до излез на село Лопате. Надлежните од претпријатието со оваа акција очекуваат да се намали можноста за излевање на реката како што тоа беше случај во зимскиот период кога Липковка се излеа во село Оризаре.
– Во моментов се префрливме на расчистување на одводниот канал во село Горно Коњаре каде состојбата беше алармантна, изјави директорот на претпријатието, Оливер Илиевски.
Досега, исчистени се три километри од речното корито на Липковка и еден километар од одводниот канал во Горно Коњаре. За оваа расчистување, претпријатието одвоило 1,2 милиони денари.
Согласно акциониот план за работа на водостопанство, наскоро ќе се чиси одводниот канал во Агино село, додека во селата Клечовце и Довезенце ќе се продлабочува речното корито кај игралиштето. Исто така во наредниот период ќе се чисти и речното корито на Пчиња кај Меморијалниот Центар АСНОМ во Пелинце, Старо Нагоричане.