Во тек е полициска акција за заплена на кокаин, дознава „А1он“. Според нашите информации, досега е пронајден кокаин од околу еден килограм.
„По судска наредба се вршат претреси на локации во Крушопек, во врска со недозволена трговија со дрога”, велат од МВР за „А1он”.
Според нашите информации, акцијата се врши во соработка со италијанската полиција и Јавното обвинителство, a кокаинот наводно требало да се транспортира во Словенија.
Акцијата со претреси во Крушопек поради недозволема трговија со дрога ја потврди и министерот за внатрешни работи Наќе Чулев кој на Фејсбук објави дека „Министерството за внатрешни работи во овој момент презема широк спектар на оперативни мерки и активности“.
„По насоки на јавен обвинител и по наредба на судија на претходна постапка се вршат претреси на подрачјето на село Крушопек во близина на Скопје поради недозволена трговија со дрога. Целиот капацитет на Министерството за внатрешни работи е ставен во заштита на граѓаните и безбедноста на државата. Помина времето кога високото раководство во МВР соработуваше и ги поддржуваше криминалните структури во државата. Повеќе информации за јавноста ќе соопштиме во текот на утрешниот ден“, напиша Чулев на Фејсбук.