Во Штип традиционално Свети крст на големиот православен празник водици се фрла на две локации.
Брегалничката епархија годинава донесе одлука наместо во Градскиот базен, крстот да се фрла од Камениот мост на реката Брегалница. На оваа локација 30 тина момчиња скокнаа по светиот крст, а го фати Горан Јовевски.
-Скокам по петти пат и пета па среќа. Нека е среќна и бериќетна 2015 година на сите, рече Јовевски.
Митрополитот на Брегалничката епархија г.Иларион кој чиноначалствуваше на светата литургија и го фрли крстот во водите на реката Брегалница од Камениот мост им го честиташе празникот Богојавление-Водици на православните верници.
-На момчето кое го фати крстот нека му е честито, нека е жив и здрав и на сите оние што скокнаа по Светиот крст. Знаеме дека претходно, светите браќа Кирил и Методиј крштеваа во водите на Брегалница и тие ги осветија овие води, вели г.Иларион.
Во старата населба Ново село во Штип по Светиот крст скокнаа 20 тина момчиња, најуспешен беше Мите Костов, кој по вторпат успева да го фати крстот.
-Во 2008 година првпат скокав и за првпат го фатив крстот цела година ми беше среќна. Ова ми е вторпат и само нека дава Господ здравје и среќа, рече Костов.
Момчињата кои го фатија крстот на двете локации во Штип имаат право да го носат по домовите на штипјани до 27 ми јануари, кога завршува празнувањето на Богојавление, а потоа треба да го вратат во црквите.
Градоначалникот на Општина Штип, Илчо Захариев и митрополитот на Брегалничката епархија г. Иларион на момчињата им врачија и пригодни подароци, меѓу кои библија и икона.