Локалната самоуправа на Охрид, заедно со ЈП „Градски пазар“ и Општинската организација на Црвениот крст оваа година првпат по повод Велигденските празници организараат саем, како активност насочена да им се помогне на семејствата од социјално загрозените категории граѓани.
Градоначалникот на Охрид Никола Бакрачески ги повика граѓаните на Охрид да го посетат саемот, да купат нешто и на тој начин да дадат свој придонес во помагањето на социјално загрозените сограѓани.
– Ние како локална самоуправа заедно до Градски пазар и со Црвениот крст оваа година ќе подготвиме дваесетина пакети за социјално загрозените семејства што ќе им бидат доделени во текот на утрешниот ден, истакна Бакрачески.
Директорот на „Градски пазар“ Тони Коталески истакна дека се предвидува оваа манифестација да добие на масовност со годините, со учество на поголем број фирми и организации.
Ангела Василеска од Факултетот за туризам и угостителство што партиципира во саемот, истакна дека покрај поддршката на ваквите активности, институцијата тука ги презентира своите производи, како велигденски козињак, пекарски и слаткарски производи, салати…
– Тоа се дел од нашата кетеринг-програма што наскоро ќе ја презентираме, производи со висок квалитет и пристојни цени, истакна таа.
Саемот ќе трае три дена, а во рамки на него свои штандови имаат уметници од градот како и основни училишта со свои ракотворби, велигденски декорации и украси. Средствата собрани од продадените украси целосно ќе бидат наменети за социјално ранливите категории граѓани, додека производители на пецива, слатки своите производи ги продаваат по симболични цени.