За време на синоќешните редовни инспекциски контроли на МВР, УЈП и Државниот пазарен инспекторат во Охрид, оштетено е службено возило на УЈП со регистарски таблички СК 3135 АЦ, паркирано во близина на плоштадот.
Како што соопшти УЈП, со остар предмет се исечени сите четири гуми на возилото.
Министерството за внатрешни работи направи увид.
– Им порачуваме на локалните бизниси и несовесните граѓани дека користењето насилни методи кон даночниците и уништувањето на јавните добра како службени возила,…, купени со парите од даноците кои ги плаќаат сите граѓани на Македонија, нема да ги спречи, ниту да ги одложи инспекциските контроли. Напротив, само остава простор за поголемо сомнение дека во конкретното место, општина, реон… работат бизниси кои избегнуваат да платат данок, наведува Управата за јавни приходи.
Во рамки на редовните контроли спроведени ноќта меѓу 15 и 16 јануари во Охрид, исконтролирани се осум угостителски објекти. Во два се утврдени неправилности, „Кадмо“ и „Перла“.
Во Кичево се исконтролирани шест угостителски објекти. Во три е утврден нерегистриран готовинскиот промет.
За објектите кои не издавале фискални сметки изречена времена забрана за вршење дејност од 15 дена, а за даночните обврзници изречена е глоба до 3.250 евра во денарска противвредност.