Во организација на СВР Куманово, денеска во кумановското „Толи Зордумис“ се одржа 56-тиот регионален натпревар „Детски семафор“ за ученици од основни училишта и „Сообраќајно-техничка култура на млади“ за ученици од средни училишта.
На натпреварот учествуваа пет основни и шест средни училишта од градовите од североисточниот регион. Целта на натпреварот, соопшти Виолета Богдановска од СВР Куманово е да се подигне јавната свест за безбедно учество во сообраќајот, почитување на сообраќајни правила и прописи, почитување на сите учесници во сообраќајот и што поголема сообраќајна култура, почнувајќи од најмала возраст.
– Учениците се натпреварува со полагање на теоретски дел-тестови и практичен дел – вешто возење на велосипед за основни училишта и вешто возење на моторцикл за средни училишта и теоретско познавање на правила и прописи со полагање на тест по електронски пат, изјави Богдановска.
Манифестацијата ја организира СВР Куманово во соработка со Општинскиот совет за безбедност на сообраќајот на патиштата и секторите за образование во општините што ги покрива СВР Куманово: Куманово, Липково, Старо Нагоричане, Ранковце, Крива Паланка и Кратово. Најдобрите од овој натпревар ќе учествуваат на државниот натпревар што ќе се одржи во Скопје.
