Утре во кривичниот суд треба да сведочи бизнисменот Иван Николов Сачевалиев во предметот „Поткуп“, во кој обвинет е премиерот Зоран Заев. Сачевалиев не се појавуваше на досегашните судски рочишта за предметот, а на последното, судијата рече дека успеале телефонски да го добијат за да дојде на утрешното судење.
Судот му го прифати брањето на Зоран Заев и на неговите адвокати, снимките за „Поткуп“, обезбедени како посебни истражни мерки да бидат изведени во пристство на јавноста.
Заев рече дека побарал јавноста да биде присутна поради фактот дека е премиер и претседател на најголемата политичка партија, со цел да поврати дел од загубената чест и углед во јавноста што му биле нарушени со нивното делумно објавување.
Заев тврди дека снимките што се објавени на интернет се со најмалку два прекина за да се дискредитира неговиот интегритет и углед. Неговиот адвокат, Филип Медарски, посочи дека снимките биле објавени за политичка егзекуција на Заев во јавноста.
„Снимките веќе претходно беа објавени во јавноста на начин што со прекините им даваат сосема поинакво значење“, рече Медарски.
Обвинителката Валентина Бислимовска од Обвинителството за организиран криминал и корупција се изјасни дека е против ваквиот предлог бидејќи, иако се декласифицирани, тие може да се користат под строго определени услови во судска постапка.
В. М.