Во манастирскиот комплекс Св. Јоаким Осоговски во Крива Паланка, од денеска до 13 јули ќе се одржи 23. сесија на Меѓународната летна школа за архитектура.
Темата на годинашната сесија на школата, организирана од Архитектонскиот факултет на Универзитетот „Св.Кирил и Методиј“ од Скопје, е „Капела за природата“, а учествуваат студенти по архитектура од земјава и од странство. Со сесијата ќе раководи доц.д-р Јован Илиевски, а гостин-тутор е познатиот фински архитект Сами Ринтала.
Студентите и професорите во наредната седмица ќе разменуваат искуства од областа на архитектурата, ќе творат во духовниот амбиент на манастирот, кој ја поттикнува креативноста на учесниците.
Традиционално школата ќе биде затворена на 13 јули со изложба на делата од учесниците во галеријата на стариот конак на манастирот.
Меѓународната летна школа за архитектура се одржува со поддршка од Министерството за образование и наука, во соработка со МПЦ и манастирот Св. Јоаким Осоговски и општина Крива Паланка.