Потписот не е испишан од Фатиме Сулејмани, утврдил вештакот кој го ангажираше Државната изборна комисија. ДИК вчера побара да се направи оваа анализа, бидејќи Беса тврдеше дека таа кога дошла да гласа видела дека некој друг гласал во нејзино име поради што ИО не и дозволил да го оствари своето гласачко право. Ова пред малку го соопшти претседателот на ДИК Александар Чичаковски.
– Графолошката анализа покажала дека потписот не е автентичен – рече Чичаковски.
По ова за збор се јави Силвана Бонева која објасни дека за неа е сомнително тоа што Фатиме Сулејмани во ДИК била донесена од СДСМ, а не од Беса, која го поднела приговорот. Таа побара да се отфрли приговорот.
– Како нејзината лична карта се нашла кај друга госпоѓа и како таа вешто го имитирала нејзиниот потпис. Што ако се докаже дека личната карта намерно била дадена на друг – рече Бонева.
