Полицијата при последната акциска контрола открила недостатоци на шест возила кои вршат јавен превоз на патници на поширокото гостиварско подрачје.
Според СВР Тетово, откриените прекршоци се санкционирани со прекршочни налози со глоби од 100 до 500 евра во денарска противвредност, а три возила веднаш се исклучени од сообраќај.
– Контролите се спроведуваа вчера од 8 до 13 часот, и беа насочени кон проверка на техничка и друга исправност на возилата кои вршат јавен превоз на патници. Со контролата вкупно биле опфатени 38 возила, автобуси, комбиња и други возила, од кои 24 испратени се на технички преглед. При тоа, кај две возила откриена е неисправност на сопирачките и светлосните уреди, две возила имале истечена регистрација и исто толку биле технички непрегледани, вели портпаролот на СВР Тетово, Марјан Јосифоски.
Покрај ова, биле констатирани и три други видови прекршоци кои, исто така, за кои исто така има соодветни поднесоци.
Од СВР Тетово најавуваат вакви контролни активности и во наредниот период, чија цел е навремено откривање и отстранување од сообраќај на технички неисправните возила, особено оние кои превезуваат ученици на гостиварското подрачје.