Пратеничката група на ВМРО-ДПМНЕ ни најмалку не е изненадена од последниот обид на Горан Сугарески за манипулација со цел да ја изврти вистината, имено, тврдат дека претседателот на Собранието Трајко Вељановски, пред неколку дена ги известил сите дека заседница за пратенички прашања ќе се разговара в понеделник.
„Иако Сугарески како и останатите координатори на пратеничките групи во Собранието пред неколку дена беа информирани од страна на Претседателот на Собранието Трајко Вељановски, дека прашањето за одржување на седница за пратенички прашања ќе биде отворено во понеделник на редовна координација, Сугарески на денешната прес-конференција глумеше и се обиде да ја претстави СДСМ како партија која што се залага и бара итно одржување на седница за поставување на пратенички прашања. Многу провиден и низок чин од негова страна“, соопштија од пратеничката група на владејачката партија.
Од таму потсетуваат и дека пратениците од СДСМ во периодот од година и поливина не доаѓаа на работа, а земаа плата од џебот на граѓаните и со самото тоа пропуштија вкупно 10 седници на кои ќе имаа можност да постават пратенички прашања од интерес на граѓаните. Од друга страна пак, дури и на неколкуте седници за пратенички прашања на кои што СДСМ присуствуваше, тие го злоупотребија правото да постават прашања кои што ги засегаат граѓаните и постојано читаа партиски соопштенија и нарачани прашања од страна на Заев и Шекеринска.