ВМРО-ДПМНЕ ја обвини Владата на СДСМ за лицемерство во образованието зашто скратила 213 милиони денари наменети за универзитетите и факултетите низ државата, наместо ветувањата за подобри услови во високото образование.
– Заев, Десковска, Туфегџиќ, Богоев и останатите во текот на изборите ветуваа квалитетно високо образование и подобри услови за студирање, а сега од позиција на власт само блокираат инфраструктурни проекти, укинуваат мерки и кратат финансии за образованието. СДС скрати цели 30 проценти од буџетот за универзитетот во Охрид. СДС крати и 50 проценти од парите наменети за ФИНКИ. Ниту Универзитетот „Св. Кирил и Методиј“ и Универзитетот „Гоце Делчев“ не останаа имуни на негрижата од страна на СДС. За жал, од оваа негрижа најмногу ќе страдаат студентите, рече на прес-конференција Јован Јаулески од Унијата на млади сили на ВМРО-ДПМНЕ.
Додаде дека новата Влада е антиреформска зашто не носи прогрес во образованието туку уназадување, а студентите, како што рече, се свесни дека се изманипулирани.