Портпаролот на ВМРО-ДПМНЕ Александар Бичиклиски денеска го обвини СДСМ за лицемерие со тоа што од една страна вели дека сака да се штеди, а во исто време единствениот градоначалник во Скопје од нивните редови Стевчо Јакимовски за украсување во Карпош ќе потроши повеќе од сите други скопски општини заедно.
– Од една страна го блокираат буџетот на државата, со што нема да се покачат пензиите и социјалната помош, со што работниците во градежништвото нема да имаат работа, со што на студентите им се загрозуваат стипендиите, на вработените платите, а од друга страна таму каде што се на власт се расфрлаат со пари 10 пати повеќе од другите, изјави Бичиклиски.
Според него, СДСМ ја практикува народната „не ме гледај што правам, слушај што ти зборувам“.
– Ја повикуваме Цветанка Иванова да се пресмета физички со Стевчо јакимовски, исто онака како што се пресмета со Благородна Дулиќ, Драгиша Милетиќ да се обиде да го нападне Јакимовски, како што го нападна Илија Димовски, а Јани Макрадули, наместо да се заканува со тепање на возрасни жени, нека му се заканува на Стевчо Јакимовски. Ги повикуваме Радмила Шекеринска, Гордан Георгиев, Горан Мисовски, Игор Ивановски, да одат и да ја блокираат општина Карпош, лицемерно и со подместување, исто онака како што ја блокираат државата во Собранието на РМ. Очигледно на Шекеринска, Георгиев, Мисовски, Ивановски им се побитни сијаличките во Карпош, од субвенциите, пензиите и социјалната помош на граѓаните, рече Биликлиски.
