Секој граѓанин да постапи по свое убедување за референдумот на 30 септември, ова е пораката која јавноста најверојатно ќе ја слушне вечерва од седиштето на опозициската ВМРО-ДПМНЕ. Исходот ќе произлезе од силниот притисок од надвор и пораките од членството внатре. Раководството на партијата во текот на денот одржува средби со пратеничката група на ВМРО-ДПМНЕ, а за попладнево се закажани состаноци на Извршниот и на Централниот комитет.
Неофицијално, пораките кој партискиот лидер Мицкоски ги упати во говорот од протестниот марш во Кичево, се насоките околу кои се движат размислувањата на мнозинството во ВМРО-ДПМНЕ.
„Кој е Христијан Мицкоски да му каже на народот што треба да прави? Да се обидува да го замајува со скапи маркетиншки трикови и странски пи-ар советници, кој ми го дал мене ова право?“, рече Христијан Мицкоски на 3 септември од Кичево.
Поранешни функционери и основачи на ВМРО-ДПМНЕ, јавно повикаа да се излезе да се гласа на референдумот, додека пратеникот Антонијо Милошоски активно води кампања за бојкот.
Официјалниот став за референдумот ВМРО-ДПМНЕ досега повеќе пати одложуваше да го соопшти на јавноста, иако е познато дека не се согласуваат со начинот на кој е формулирано референдумското прашање, како и дека се противат на Договорот со Грција. Овие ставови лидерот Мицкоски им ги соопштил и на странските дипломати кои деновиве беа во посета на Македонија, во знак на поддршка за референдумот. Мицкоски лично и на германската канцеларка Меркел и кажал дека добиле навигација од средбите со граѓаните и конечената одлука за референдумот ќе ја соопштат неделава.
Галена Николовска-Ризвановиќ