ВМРО-ДПМНЕ во писмената реакција на изјавата на Јани Макрадули од СДСМ апелира опозицијата да се врати во Собранието и политичката дебата да ја насочат во институционална рамка.
– Тоа е она кое што граѓаните го очекуваат од нив, да работат за нивните интереси и интересите на државата и да се однесуваат рационално, сериозно и демократски, се вели во реакцијата.
Според ВМРО-ДПМНЕ, потезите на СДСМ се во насока да се заштити кариерата на Бранко Црвенковски и да се затскријат неговите неуспеси и погрешни политики. – Ако Јани Макрадули одбрал да биде заложник на кариерата и политиките на Бранко Црвенковски, тогаш тоа е негово лично право и избор. Но Јани Макрадули, како и целото раководство на СДСМ не смеат и понатаму да ја држат во залог судбината и иднината на целиот народ и на Република Македонија, креирајќи фиктивна реалност, истакнува ВМРО-ДПМНЕ.
Од Макрадули, како што се наведува во реакцијата, очекувале да се извини за оштетувањето на компјутерската и комуникациската опрема во Собранието и за обидите и заканите за физичкиот напад врз повозрасна пратеничка.
