„ЛДП како партија од своите редови имаше градоначалник на град Скопје два мандати. Иако имаше можност цели два мандати не се обезбедија ниту бесплатен превоз за било која категорија на граѓани, ниту се направи некое позначајно обновување на возниот парк на Јавното сообраќајно претпријатие.
– Сите ги паметиме старите автобусите кои се користеа, а беа од минатиот век”, се вели во писмената реакција од ВМРО-ДПМНЕ, на укажувањето на Либералдемократите дека наместо скап блиндиран мерцедес од 600.000 евра власта треба да обезбеди бесплатен превоз за сите студенти.
„ЛДП или нема квалитетни идеи или нема за што друго да го обвини Коце Трајановски. Сега Скопје се гради и унапредува. Денес граѓаните на Скопје се возат во нови автобуси. Целосно е обновен возниот парк на ЈСП. Набавени се нови градски автобуси од кои 136 двокатни, 80 нископодни и 16 мини автобуси и сите овие се со високи еколошки стандарди. Обезбеден е и бесплатен превоз и тоа за сите пензионери секој вторник и петок”, реагираат од ВМРО-ДПМНЕ.
