Владата на Република Македонија за спроведување на изборите попладнево соопшти дека донела одлука да бидат поништени правни акти на министрите за внатрешни работи и за труд и социјална политика донесени во периодот од 11 ноември 2015 до 7 април годинава.
Во соопштението од Владата се наведува дека овие правни акти се противзаконски и еднострано донесени бидејќи при нивното донесување министрите не ги почитувале законите, односно не ги донеле актите во согласност со дополнителниот заменик министер и на документите нема потпис од дополнителниот заменик министер.
– Одлучувањето на Владата е направено врз основа на Законот за Владата во законска постапка. Согласно член 30 став 2 од Законот за Владата, Владата има право и должност да укине или поништи пропис или друг акт на министерствата, органите на државната управа и управните организации кој не е во согласност со Уставот, законот или друг пропис на Собранието, односно пропис на Владата, и врз основа на овој член Владата дејствуваше. Врз основа на официјални информации и акти кои беа доставени и разгледувани во законска процедура, беше констатирано дека министрите за внатрешни работи и за труд и социјална политика, со противзаконски и еднострано донесените акти ги повредиле и работеле спротивно на членот 46 ставовите 2 и 3 од Законот за Владата, а во врска со членот 47 од Законот за Владата, се појаснува во соопштението.
Владата наложи во Министерството за внатрешни работи и во Министерството за труд и социјална политика да се воспостави претходната состојба каква што била пред донесувањето на овие акти.
