Од најстаро до најмладо утрово по четврти пат ги блокираат багерите да го унишат едниот од последните паркови кои останаа во Тафталиџе 1 на улицата Букурешка. Жалосно е ова што се прави, велат граѓаните. Прашуваат каде ќе одат сега, бидејќи се што остана на улицата се згради и асфалт.
– Моите деца ете ги играат, да ги видат како играат. Ова не знам што е, на некого џебот да се полни или да не затворат? Тогаш да не умрат подобро, вели жителка на Тафталиџе.
Со бастунот ќе шетам по улица, на друго место нема каде, нека ме газат автомобили. На друго место немам каде, тука бетон ќе биде се, зеленило нема, стар човек да седне, деца да играат, нели е срамота. Ова е голема катастрофа, упорно ќе градат па макар и со полициско обезбедување, па таа полиција чија е, народот треба да го брани, а не тие што ги земаат парите, велат граѓаните.
Граѓаните велат дека паркот е како нивни дом, дека доаѓаат тука по цели денови, а општината користи додека помладите се на работа да почнат со копање. Тоа е работа на политика, заклучуваат жителите на Букурешка.
– Тајкуните ни направија за никаде, држава не постои, вели граѓанин.
Жителите се одлучни, велат ако треба и ќе лежат во паркот со цел да не се почне со копање на последното зеленило на улицата.
– Децата ни играле тука, сме чистеле, сме ја коселе тревата во паркот. Било многу убаво, весело, не знам што стана сега згради, згради има на секој чекор. Жалосно е ние тука да дежураме, против нашата волја некој да си го полни џебот. Тоа не е фер, ова е здравје, гледајте колку згради има околу ова земјиште. Сите сме потресени, и деца и стари и млади, велат жителите.
Додека граѓаните секојдневно се обидуваат да ги спречат градежните работи со кои ќе се уништи и последното парче зеленило кое им остана, општината не се откажува од својата намера и тоа мало место да го претвори во бетон.
Александар Тодески