Кандидатот за трет градоначалнички мандат на општина Струмица Зоран Заев денеска ги покани сите политичари во Република Македонија претстојниот викенд да дојдат во Струмица и да бидат негови гости за карневалот. Тоа според него ќе биде одлична можност да здивнат од кампањата и да уживаат во една од најголемите културни манифестации во Македонија, струмичкиот карневал.
„Да не заборавиме дека кампањата ќе помине и после тоа сите живееме овде во ова наше општество. Сите заедно работиме и се трудиме меѓусебно да си помогнеме, затоа сакам да пуштам покана да бидат мои гости овде во Струмица, покрај моите од Сојузот за иднината и премиерот Никола Груевски и министрите во владата, посебно оние кои соработуваат со општината, министерството за транспорт и врски, министерството за култура, министерството за образование, министерството за екологија.
– Да ги поканам политичарите од албанските политички партии кои што ќе имаат навистина неповторлива можност да здивнат и од кампањата. Овие денови Струмица живее за карневалот.
– Јас сум карневалист заедно со моите сограѓани. Јас ќе здивнат од кампањата за време на карневалот, препорачувам да бидат мои гости да дојдат, ем да здивнат од кампањата, ем да пуштиме позитивна порака до сите во Република Македонија“, рече Заев.
Карневалските празнувања во Струмица почнуваат в петок со традиционалниот маскенбал, а главната карневалска вечер е в сабота кога по улиците на Струмица се очекува да продефилираат над три илјади маскирани учесници. Според најавите, карневалот во Струмица годинава ќе привлече над 30 илјади посетители од државата и странство.