Вистината е дека нема да има подобар договор и нема да има друга преговарачка рамка, а ова го вели Европската унија, рече премиерот Димитар Ковачевски на обраќањето пред Комисијата за уставни измени во кое според Деловникот требаше да го образложи предлогот и потребата од отворање на Уставот.
– Министрите во Владата покажаа совесност и едногласност. Го утврдивме предлогот за Уставот и решивме да не калкулираме со партиски рејтинзи, одлучивме да не мислиме за себе, туку за европската цел. Во следните неколку недели ќе стане јасно кој мисли за себе, а кој мисли за своите деца и за граѓаните. Секој сам треба да одлучи дали ќе даде глас за Европа или ќе го задуши гласот на совеста во себе и ќе одлучи да ја однесе земјата во изолација по нечиј налог – рече Ковачевски.
Според Владата, предлогот за вметнување на Бугарите во Уставот и на уште неколку етнички заедници е поради зајакнување на правата на заедниците поради усогласување со Копенхашките критериуми за членство во ЕУ, а уставната традиција на Македонија е започната уште со Крушевската република.
– Уставноправната поставеност и традиција на Македонија во која се афирмира јазичниот , верскиот и културниот идентитет на сите заедници во нашата земја започна уште во државнпоправните традиции наведени во Крушевската република и во одлуките на АСНОМ.
Нашата земја денес е вистински пример за функционална мултиетничка демократија и преку уставните акти ние сме општество кое гарантира еднакви права на сите заедници.
Со тоа што развиваме еднакво општество за сите граѓани, сме препознаени од Европа и сме Европа на мало. Отттука обврската преземена во рамки на преговорите со ЕУ е исклучиво со уставните традиции.
Денес има неповторлива шанса да се продолжи евроинтегративниот пат и потоа со забрзани чекори да влеземе во ЕУ. Граѓаните нема за што да бидат загрижени, а ние треба да носиме мудри одлуки кои нема да ја заглават државата во изолација.
После 17 години ги отворивме преговирите со таква мудра одлука и притоа јазикот и идентитетот се заштитени. Примарен фокус на уставните измени е да не задираат во ниту едно идентитетско прашање. Ние не треба да ја пропиштиме оваа шанса, еднаш тоа се случи кога се одвоивме од Хрватска која 10 години е членка. Европските претставници рекоа дека има големи шанси Албанија да се издвои од нас и да продолжи напред ако ние не ги донесеме уставните измени – истакна премиерот во своето образложување на уставните измени.
Дебатата во Комисијата ќе трае до 9 август, а на 18 август е закажана пленарна седница на која власта ќе треба да обезбеди 80 пратеници кои ќе гласаат за отворање на Уставот.