Рекетарскиот октопод е скандал што Русковска-обвинителството сака да го ограничи само на прво и на второосомничените, познати како Боки 13 и Кичеец, рече денеска портпаролот на ВМРО-ДПМНЕ, Наум Стоилковски.
Тој го изнесе ставот на опозициската партија, според кој треба да има проширена истрага, која ќе зафати и во таканаречената невладина на Бојан Јовановски, што ќе открие дали таа била параванот на октоподот и каде сè се потрошени парите што ги добивала организацијата под ставката донации.
„Обвинителството мора истрагата за рекетот да ја прошири и на невладината организација Меѓународен сојуз на првообвинетиот Боки 13 и да испита дали и каква улога имала оваа организација во изнудата, заканите и рекетот што се правел. Јавноста веќе објави дека индиректно оваа невладина организација добивала сомнителна трансакција есента 2017 година во висина од 750 илјади евра од битолски бизнисмен. Внимавајте, овој бизнисмен, кој поседува градежна фирма, ѝ платил толку пари на една повозрасна госпоѓа за идеја за изградба на социјални станови“, рече Стоилковски.
Тој порача дека Русковска-обвинителството мора да открие колку други бизнисмени ѝ платиле огромни суми на оваа организација под сомнителни околности и која била улогата на функционери на СДСМ во дејствувањето на Боки 13.
„Обвинителството и да не сака, мора да го расчисти овој мегаскандал и во најмала рака досега требаше да ја приведе Катица Јанева, но и уште десетици други ликови од СДСМ. Не може Јанева да биде изземена од скандалот, од криминалот, особено од фактот дека ѝ е одземен телефон, односно телефоните што се дел од истрагата. Таа очигледно е вмешана во овој криминал. Не може да бидат изземени десетици други ликови од СДСМ, кои имале тесна соработка со Бојан Јовановски“, истакна партискиот портпарол додавајќи дека е јасно оти Боки 13, сам, без заштита од власта и без поддршка од институциите, не можел да изнудува огромни суми пари.