Антикорупцискиот тим на СДСМ денеска објави нови наводи за, како што тврдат, сомнителни јавни набавки во општини раководени од ВМРО-ДПМНЕ.
Според СДСМ, податоците биле доставени од граѓани преку дигиталната платформа „МИЦКО.мк“ и се однесуваат на компанијата „Пирамид билдинг солушнс“, за која опозицијата тврди дека во периодот од 2022 година до денеска добила вкупно 51 тендер во општини под контрола на ВМРО-ДПМНЕ, со вкупна вредност од околу 16 милиони евра.
Од СДСМ наведуваат дека најголем дел од тендерите биле доделени од општина Аеродром – 22, од Гази Баба – 10, како и од Ѓорче Петров, Прилеп, Битола, Гевгелија и други општини каде градоначалниците се од редовите на ВМРО-ДПМНЕ.
Според изнесените наводи, дел од тендерите биле финансирани и со средства од унгарскиот кредит. Последниот договор, како што тврди СДСМ, бил склучен во декември 2025 година со Град Скопје и изнесувал околу 320 илјади евра.
СДСМ дополнително тврди дека добиле информации од свиркачи според кои брачни партнери на високи функционери на ВМРО-ДПМНЕ наводно биле ангажирани во оваа компанија преку договори за дело, но велат дека тие податоци сè уште се предмет на проверка.
Од партијата ги повикаа Јавното обвинителство, Финансиската полиција и Државната комисија за спречување на корупцијата да постапат по овие наводи и да утврдат дали имало злоупотреби во доделувањето на јавните набавки.