Власта во заминување преку Финансиската полиција спроведува нарачана, одмаздувачка мисија во Струмица и Куманово, општини раководени од СДСМ.
Цели 10 години овие општини се под постојани, интезивни контроли на бројните партизирани институции.
Струмица и Куманово нема што да кријат. Постапките и јавните набавки се согласно законите.
Бараме Финансиската полиција јавно да ги објави резултатите од спроведената контрола.
ВМРО-ДПМНЕ ги злоупотребува институциите со намера да го сокрие криминалот во своите редови, на локално и централно ниво.
Со ваквите постапки ВМРО-ДПМНЕ очајно се обидува пред јавноста да ги изедначи сите и да ги претстави како криминалци. Но во политиката, како и во животот, не сме сите исти, рече на прес конференција портпаролот на СДСМ, Петре Шилегов.
Гнездото на криминалот и корупцијата во Македонија е во раководството на ВМРО-ДПМНЕ.
Вистински хаос, криминал, корупција и финансиски скандали се случуваат во општините раководени од ВМРО-ДПМНЕ.
Типичен пример за тоа е општина Битола и градоначалникот Талески. Неговиот криминал со превоз на ученици лично го опиша Зоран Ставрески, Специјалното јавно обвинителство оформи предмет а Судот изрече мерка притвор на Талески.
Финансиска полиција има обврска да ги провери сите јавни набавки во другите општини на државата и јавно да соопшти што пронашле. Притоа да обезбеди јавност и транспарентност во постапките.
Финансовата полиција работи по допрен глас.
Денеска јавно поднесуваме пријава до Финансиската полиција да ги провери јавните набавки за превоз на ученици во сите општини во Македонија.
Идентично, како тоа што го прави во Струмица и Куманово.
Ако тоа не го направат првите луѓе на Финансиската полиција треба да знаат дека ќе одговараат за несовесно, пристрасно работење и за во заштита на криминални активности, рече Шилегов.