Министерката за одбрана, Радмила Шекеринска, денеска во Министерството за одбрана се сретна со својата албанска колешка, Олта Џачка, која првпат е во официјална посета на земјава.
Како што информираат од Министерството за одбрана, Шекеринска потенцирала дека земјите од регионот покажале оти знаат да соработуваат, знаат да се почитуваат и дека знаат во најважните моменти да си дадат целосна поддршка.
„Република Албанија тоа го направи со континуираната поддршка за нашето членство во НАТО, но и со извонредно брзата реакција кога на 14 овој месец, како трета земја, веднаш по Грција и Словенија, го ратификува пристапниот протокол за пристапување на Северна Македонија во НАТО. Така постапуваат само добрите пријатели и добри сојузници и бидете сигурни дека тоа го цениме и дека тоа го паметиме“, рекла министерката.
Џачка во својата изјава рече дека потпишувањето на протоколот за членство во НАТО е еден многу важен момент, а со тоа целиот регион ќе биде побезбеден, постабилен и на иднината ќе може да гледа со повеќе оптимизам.
„Албанија стабилноста и безбедноста на Република Северна Македонија ја гледа како еден главен услов за безбедност на целиот регион, а нашата поддршка во овој голем процес беше една од главните стратешки цели. Тоа е причината поради која Албанија го ратификува протоколот за членство во НАТО и тоа е причината поради која ние Албанците, но и сите што сакаат стабилност и развој на регионот, добрите можности на соседите ги гледаме на тој начин“, истакна албанската министерка за одбрана.
Од надлежното Министерство информираат дека за време на средбата двете делегации разговарале за подобрување на меѓусебната соработка во областа на одбраната, заедничкиот придонес во мировната мисија „Одлучна поддршка“, учество во иницијативата САД – јадранска соработка и учеството на припадниците на нашата Армија на мултинационалната вежба, која годинава ќе се одржи во Албанија.