Погледнете што прави власта на Никола Груевски. Само овој месец, непосредно пред да отпочне примената на новите закони за администрацијата, со заострени критериуми, распишани се огласи за прием на над 500 лица во државните институции, рече Љупчо Николовски, член на Извршен одбор.
Се примаат:
-30 државни службеници, главно референти со средно и вишо образование во Министерството за труд и социјална политика,
-17 државни службеници, главно помлади соработници во Министерството за финансии,
-13 државни службеници во Министерството за образование и наука,
-6 државни службеници, главно со средно образование во Министерството за информатичко општество,
-5 државни службеници, главно со средно или вишо образование во Министерството за правда – Управа за водење матични книги, плус 4-ца во Бирото за судски вештачења (меѓу нив референти за упатување странки, без потребно работно искуство)
-3 државни службеници во Министерството за транспорт и врски, исто така со средно или вишо образование.
Речиси и да нема државна институција во којашто нема вработувања: во канцеларијата на премиерот, во Агенцијата за финансиска поддршка на земјоделството, во Дирекцијата за заштита на лични податоци, во Јавното обвинителство.
А како што објавивме, само во Владата, преку Генералниот секретаријат се отворени дури 194 позиции.
Дали ова брзање за полнење на државната администрација по старите критериуми значи дека новите кадри не се способни да ги минат заострените критериуми што ќе се бараат од февруари?
Кога ги донесоа законите за административни службеници и за вработување во јавниот сектор, чиишто измени се денеска на собраниска седница, власта убедуваше дека со заострените критериуми: полагање англиски јазик, компјутерски вештини, психолошки тест, Република Македонија ќе добила квалитетна, стручна и ефикасна администрација.
Но ова што се случува последниов месец, со вртоглавите вработувања по секоја цена, пред февруари, го покажува вистинското дволично лице на ВМРО-ДПМНЕ.