„Бројот на ученици во образованието се намалува! Власта го крие овој факт. Ова ја прави ситуацијата алармантна.
Многу училишта и училници низ македонските села и градови останаа празни со почетокот на учебната година.
Oд 2007-ма до 2013-та година, седум години од владеењето на Никола Груевски, бројот на ученици е намалена за 27 илјади! Ова е официјална бројка од Државниот завод за стастистика“, рече на денешната прес-конференција Љубиша Николиќ, СДСМ.
„Еве ја причината, зошто во Штип се преполовени паралелките, во Охрид е намален бројот на првачиња за 25 проценти, а во Струга за цели 50 отсто. Тоа е причината за намалувањето на учениците во Велес, Кичево, Другово….
Информациите од теренот говорат дека наместо да превземе сериозни мерки власта го прикрива проблемот со прераспределба на помалку ученици во ист број паралелки.
„Јасно е зошто во голем број од градовите и селата го нема веселиот детски џагор и возбудата за почетокот на првиот училишен час. Останаа само предметите и повозрасните жители, кои сведочат за некои подобри времиња во нивните места.
Фрапантни се бројките и во средното образование, каде што бројот на средношколци, за истиот период е намален за 5 илјади!
Погрешните политики на власта, кои доведоа до сиромаштија и безперспективност го земаат најсуровиот данок. Младите се поретко се решаваат да основаат семејство а се повеќе да ја напуштат државата. Дури и цели семејства заминуваат од своето родно место.
Социјалдемократскиот сојуз повикува сериозно да се сфати состојбата. Веднаш треба да се направи стручна анализа за причините и власта да се фокусира на приоритетите за граѓаните.
Во спротивно, македонскиот аеродром ќе биде главното свратилише, но не на туристите, туку на младите, кои набавиле билет за во еден правец“, рече Николиќ.