Град Скопје почна реконструкција на булеварот „Александар Македонски“ во општина Гази Баба во делот на источниот влез во главниот град, откако минатата година беше реконструиран и западниот. Должината е 5,3 километри – од клучката кај Хиподром до крстосницата кај Скопски саем во Автокоманда.
-Ова е еден извонреден потег, поголем од пет километри. Ги замолувам граѓаните да имаат трпение, ќе работиме деноноќно со цел источниот влез да го оспособиме што е можно побрзо и да се префрлиме на излезот од Скопје, од другата страна, за да се избегнат гужвите. Куриозитет овде е што првпат Град Скопје ќе изврши експроријација на земјиште за да изградиме велосипедска патека што ќе го подобри урбаното живеење и, конечно, ќе има велосипедско поврзување на граѓаните од Синѓелиќ и Маџари со остатокот од градот. На овој потег не е работено 40-ина години, во добар дел булеварот е во очајна состојба, изјави градоначалникот Петре Шилегов.
Додаде дека во главниот град е во тек градежна офазнива, се работи на 23 улици и зимата, како што рече, ќе ја пречекаме со обновена речиси цела инфраструктура на која се работеше лани и годинава.
Градоначалникот на Гази Баба Борис Георгиевски посочи дека се работи за капитален проект, очекува да заврши од 40 до 60 дена и апелираше до сите учесници во сообраќајот дека може да ги користат и алтерантивните влезови од источната страна на Скопје, како обиколницата и улицата „Благоја Стефковски“ за сообраќајниот метеж да се намали за време на реконструкцијата.
-Ова е ќе биде пример како може по 40 години да се направи добра реконструкција, а не со крпење и закрпување како во изминатиот период и решение за влезот од исток еднаш да биде ставено во целосна функција, рече Георгиевски.