Со 45 автомобили, ВМРО-ДПМНЕ го блокираше булеварот „Туристичка“ во Охрид. На протестот имаше и стотина лица кои стоеја на улицата. За разлика од Скопје, во Охрид немаше скандирања, ниту пак, инциденти. Единствено, нервози возачи кои мораа да користат алтернативни улици за да стигнат до дестинацијата каде се упатиле. Додека траеше протестот, возачите на автомобилите стоеја на тротоарите, како и во средината на кружниот тек.
Демонстрантите на протестот организиран од ВМРО-ДПМНЕ, го вееја македонското знаме и знамето од Вергина. Ги имаше на различна возраст, а дел од нив, се групираа и без заштитни маски.
Некои се откажаа од тоа два часа да ги држат знамиањата во раце, па ги ставија знамињата со држачот во земја. Протестот го обезбедуваа и неколку полициски службеници, кои стоеја на страна.
Инаку, на протестот во Скопје имаше и инцидент откако беше приведен демонстрант. Очевидците тврдеа дека младото момче заврши со лисици бидејќи ги снимал полицајците во лице и се спротиставија, додека од МВР велат дека приведениот ги омаловажувал полицајците.
ВМРО-ДПМНЕ со протестот сака да издејствува Владата да даде документ т.н. патоказ, за кој тврдат дека постои и велат оти со истиот се преговара со Бугарија. Од опозициската партија кажаа дека ако не се даде на увид овој документ, ќе има уште помасовни протести.