(ВИДЕО) „О2 иницијатива“: Зошто нема казни за бурето со оган пред Собрание?

„Никогаш нема од нас да биде држава за почит со ваков однос. Се пали на отворено пред Собрание на Република Македонија, во импровизирано ќумбе од буре, црниот чад и смрад од горена пластика се шири и никој не рагира. Постојат ли служби во Собрание на Република Македонија за обезбедување? Постои ли еден пратеник што е на работа во 8:30 ч и не го видел ова? И никој не реагира? Немаат публика или спремен говор колку се загрижени за загадувањето, па не можат да излезат да им објаснат на луѓево дека не смеат, дека е забрането со закон, дека е штетно пред сè за нив“, прашуваат од „О2 инцијатива“.

Тие на својата фејсбук-страница објавија и снимка од бурето со оган со кое се грејат демонстрантите од „Македонија блокира“.Ги прозваа МВР и надлежните инспекции од градот затоа што нема казни за ова што се случува, како што велат, пред нивните очи.

„И сето ова е на 100 м од градска болница, Универзитетска клиника по хируршки болести ‘Св.Наум Охридски’- Скопје, во центар на метрополата што конкурира за зелена престолнина. На реакцијата дали знаат дека е забрането, одговорот е: Па полиција гледа и ништо. И затоа ни се случува ова, фрази, семинари, трибини, говори, програми, а на терен и во суштина НИШТО“, велат од „О2“.