Дополнителниот заменик-министер за земјоделство Љупчо Николовски денеска побара Агенцијата за храна и ветеринарство сериозно да се заземе за решавање на, како што рече, проблемот со сомнителните пијалоци кои се продаваат низ државата, а од еден од нив, деца завршиле во болница.
– Агенцијата за храна и ветеринарство со леснотија го прогласи пијалокот за безалкохолен и ја префрли вината на лицата што го конзумирале без да спроведе лабораториски тестирања на истиот, а за добиените резултати ја информираат јавноста, изјави Николовски.
Тој обвини дека АХВ нема донесено правен акт којшто треба да ја регулира оваа област и да обезбеди правна рамка. Според него, во најголем дел од државите како во Србија, Босна и Херцеговина и во САД има правилници во кои енергетските пијалоци се правно регулирани.
– Ние веќе алармиравме, дека во Македонија се продаваат пијалоци со сооднос на кофеин и алкохол што не е дефиниран во ниеден правилник. Презентиравме стручно мислење од Институтот за јавно здравје, како највисока научна институција од областа на безбедноста на храната и јавното здравје во РМ, за еден таков пијалок што претставува закана за јавното здравје, посочи Николовски.
