Комитетот против тортура на Обединетите нации во својот извештај од мај бара веднаш да се преземат мерки за да се запрат нехуманите и деградирачки услови на притвор во центарот во Гази Баба – тој да се затвори и да се најдат други алтернативни решенија.
На овој извештај на ООН од 7 мај, денеска потсети аналитичарот и активист Суад Мисини кој веќе шест дена штрајкува со глад пред Собранието на РМ, а од вчера го радикализираше штрајкот па не пие ниту вода. Иако вчера беа изгласани измените во законот за азил, тој бара власта да спроведе итни мерки и да го затвори центарот во Гази Баба.
– Значи тоа го бара и Комитетот на ОН, не само јас и велат итно! – рече Мисини.
„Комитетот е загрижен заради што мигрантите се префрлаат и притвораат во Прифатниот центар за странци- Гази Баба, каде условите на притвор каде нехуманиот и деградирачки третман е во спртивност со Конвенцијата против тортура“, стои меѓу другото во извештајот на Комитетот против тортура на ОН, кој се однесува на Македонија.
– Оваа квалификација е многу серозна и треба да ги замисли властите и ова е уште еден обид да ги сензибилизираме за потребата итно да преземат мерки, овие луѓе да бида ослободени и евентуално да бидат соодветно третирани и сместени во соодветни места. Овие луѓе се во Центарот во правно нерегулирана ситуација и затоа уште од почетокот барав да им бидат стопирани постапките затоа што сите рокови за постапување се поминати, а и луѓе кои се во својство на сведоци се држат таму во заточеништво, вели Мисини.
Она што недостасува сега е да се видат прецизни мерки, конкретен план и конкретни рокови кога и како ќе се реши судбината на овие луѓе. Комитетот нагласува дека овие луѓе не смеат да се држат во пртивор без рок, а според македонските закони, луѓето во Центарот кои се во својство на сведоци, не можат да бидат притворени таму.
– Нема да го прекинам штрајкот се додека властите не преземат итни мерки да се прекине голготата на луѓето што се заточени таму и доколку во текот на денешниот ден, македонската јавност не добие конкретен план како ќе се реши судбината на овие луѓе, продолжувам со мојот тотален штрајк и утре ќе ви се обратам со нова состојба од влезот на центарот во Гази Баба, рече Мисини.
Тој извести дека и Центарот за азиланти во Визбегово веќе се полни до максимални капацитети. Мисини вели дека се уште го издржува штрајкот со глад и жед и дека нема да попушти во своето барање да се затвори центарот во Гази Баба каде бегалците се држат во ужасни услови.
А.Б.