Меѓународниот Универзитет Струга работи како пералница за дипломи – констатираат просветните инспектори. Според последните сознанија утврдени при претходната инспекција, од Државниот просветен инспекторат, повеќе од 900 студенти учат без нострифицирани документи. Освен студентите, инспекторите утврдиле дека и професорите предаваат со невалидни дипломи, а меѓу нив го посочуваат и актуелниот градоначалник на Струга, Рамиз Мерко. Просветните инспектори кои ја „чешлале“ документацијата на универзитетот се сомневаат дека поради вмешаност на високи владини функционери, судии и нотари, се толерира незаконското работење на овој приватен факултет.
– Ваквите напади дојдоа зашто отворено се констатира дека актуелниот градоначалник Рамиз Мерко има докторска диплома од Нови Пазар, која не е нострифицирана и тој добива научно звање доцент и вонреден професор, вели инспекторот Ѓорѓи Илиевски.
Тој заедно со неговиот колега од Државниот просветен инспекторат , вчера биле нападнати на универзитетот при обид за инспекција. Од Универзитетот денеска не беа достапни за коментар, а одговор не добивме ниту од градоначалникот Мерко.
Галена Николовска-Ризвановиќ