Ако може во Скопје да има и лавови и бикови, можеби целата зоолошка градина, зошто да не и двоглавиот орел кој е од овој крај, вели градоначалникот на Чаир, Изет Меџити, во неделното интервју на Радио Слободна Европа.
„Прво, не може да биде двоглавиот орел како претекст за тоа што е преземено во Бутел и преку ноќ донесената таква одлука, бидејќи овој симбол не е донесен за инает кон другите, туку за вреднување на симболот на Албанците и се базира на одлука донесена од програмата во 2012, а како посебна одлука во 2015 година, почитувајќи го принципот на Бадентер. Второ, ако може во Скопје да има и лавови и бикови, можеби целата зоолошка градина, зошто да не и двоглавиот орел кој е од овој крај. Не може да се поставува таква паралела и квантитативно ако се гледа, бидејќи се поставени стотина споменици од другата страна, каде реално еден Македонец и не ги познава повеќето од нив кои се и што се. А во Чаир во овие десет години ги поставивме Скендер-бег, Хасан Приштина и двоглавиот орел. Ни квалитативно, ни квантитативно не може да се воспостави таква паралела или да биде претекст за поставување крст“, вели Меџити во интервју за Радио Слободна Европа.