Тешко оди почетокот на седницата , на која единствена точка на дневен ред е извештајот за работа на Агенцијата за администрација. Од ВМРО-ДПМНЕ обвинуваат дека Деловникот за работа на Собранието бил прекршен уште синоќа , кога околу полноќ завршила седницата на Комисијата за финансирање и буџет, а Извештајот не бил доставен до претседаталката на комисијата, туку бил потпишан од членови на власта.
-Имаше две груби прекршувања на деловникот. Извештајот на комисијата, според наши информации потпишан е од членови на комисијата, пратенци од парламентарно мнозинство, а второ прекршување е што на Законодавно-правната комисија воопшто не се отворои расправа за ребалансот, обвини Илија Димовски.
Претседателката на комисијата Лилјана Кузмановска тврди дека таа до денеска не го добила извештајот на комисијата.
-Јас како претседател на Комисијата за финанасирање и буџет имам обврска да го потпишам извештајот од десетдневната расправа за ребалансот на буџетот. Комисијата заврши околу полноќ , а до денес немам таков извештај. Кога ќе го разгледам, ќе го потпишам извештајот, но имаме информации дека бил потпишан од СДСМ. Јас не стојам зад тоа. Тоа е грубо кршење на деловникот. Од Талат Џафери слушам дека не сум сакала да потпишам, тоа не е вистина, рече Кузмановска.
Собранискиот спикер Талат Џафери, пак уверува дека претседателката на комисијата Кузмановска одбила да го потпише извештајот:
-Јас бев присутен овде синоќа на полноќ и знаете дека дадов упатства да го потпишете извештајот, а тоа како постапивте вие е друга работа. Спорно не беше да добиете процедурално збор, туку писмото кое сакавте да го испратите.