Тројца бугарски државјани по расправијата со македонските полицајци беа приведени од полициjaта на граничниот премин Деве Баир.
По неколку часовно чекање поради пад на системот, колоната возила со Бугари кои требаше да одат на чествување на македонскиот револуционер Гоце Делчев, почна да се движи.
Но, откако влегоа две возила, полицијата почна да ги реди останатите во колона после преминот, неколкумина беа вратени назад затоа што сакаа да истакнат венец наменет за гробот на Гоце Делчев.
Полицијата почна детално да ги претресува возилата и во еден момент се случи расправија по која многубројната полиција веднаш ги приведе бугарските државјани, а објективот на „А1он“ го сними инцидентот.
„Околу 12.45 часот на Граничниот премин Деве Баир дошло до нарушување на јавниот ред и мир од страна на Г.З (35),А.Х(50)и Р.Х(54) бугарски државјани кои најпрво вербално, дрско и недолично со најпогрдни зборови се однесувале. Потоа се обиделе и физички да ги нападнат полициски службеници кои преземале службени дејства, при што се приведени и се работи на целосно расчистување на случајот“, соопштија за „А1он“ од МВР.