Зоран Илиоски, кандидатот за градоначалник на Битола од ВМРО-ДПМНЕ и коалицијата денеска во изјава за медиумите потсети на два проекти за кои, како што рече, нивните опоненти шират невистини дека се откажале и целосно ги игнорирале.
– Не може и не смее да се игнорираат 37 милиони евра за гасификација и 47 милиони евра за топлификација – живи пари кои се реални, обезбедени и веќе се реализират. Гасоводот Неготино-Кавадарци веќе е на пат кон Битола и во 2019 година треба да почне изградбата на дитрибутивната гасоводна градска мрежа, а првите корисници на топлинска енергија од РЕК ќе се приклучат на централното парно греење следната зима. Проектите се регулирани со посебен закон, а дел од парите се обезбедени преку заеми од сериозни странски банки и изградбата е во тек и е во напредна фаза. Единствено што може да ги спречи или одложи се некакви измислици и манипулации од типот на згрешена траса какви што веќе видовме, рече Илиоски.
Тој додаде дека краткорочна гасификација на Битола по примерот на Струмица не може и не смее да биде замена за овие гигантски, капитални и долгорочно издржани проекти.
– Битолчани не смеат да наседнат на импровизирана гасификација по струмичкиот модел на Заев, со дотур на гас со цистерни која е скапа, крајно небезбедна, со можност за богатење на некој тендераш близок на Заев кој би го набавувал гасот, по висока цена на грбот на Битолчани, рече Илиоски.