Борис Георгиевски, кандидат за градоначалник на Општина Гази Баба од коалицијата предводена од СДСМ денеска во изјава за медиумите рече дека граѓаните се исправени пред историска одлука, која ќе го промени изгледот, духот и начинот на функционирање на општина Гази Баба.
– Нашата општина во изминатите години беше маргинализирана, уназадена и само место за реализација на интересите на локалната власт во заминување. Се обврзавме дека тој амбиент ќе го промениме и дека ќе создадеме општина за пример, отворена и услужна за секого. Општина во која на прво место ќе бидат интересите и потребите на секој граѓанин. Ќе ги вклучиме граѓаните во поставувањето на приоритетите при носењето на општинскиот буџет и транспарентно ќе известуваме за трошењето на истиот, рече Георгиевски.
Тој најави отворени денови во кои тој, како иден градоначалник ќе го посетува секое населено место и ќе биде отворен за секој предлог, сугестија или критика од граѓаните.
– Новата локална самоуправа ќе биде отворена за да може секој граѓанин да добие навремени, квалитетни и евтини услуги на едно место. Ќе го вратиме функционирањето на месните и урбаните заедници кои ќе бидат основната клетка во нашата општина и преку нив ќе ја извршуваме нашата основна задача – да им служиме на граѓаните. Почитувани, јас и мојот тим одговорно стоиме пред вас и се обврзуваме дека ќе изградиме една нова Гази Баба. Гази Баба која ќе биде пример за останатите. Општина во која ќе има подеднакви можности и услуги за сите без разлика на партиска, етничка или религиозна припадност. Општина која отворено ќе им припаѓа на граѓаните, рече Георгиевски.
