Министерот за животна средина Садула Дураку не знае дали ќе биде сменет од министерското место, како дел од „метлата“ на Заев. На прашање на „А1он“ дали ќе биде назначен на друга функција, Дураку вели дека зависи од лидерот на ДУИ, Али Ахмети, како и од партиските органи.
„Прашајте го Ахмети за оваа работа, јас не знам ништо. Не знам, централното раководство на ДУИ одлучува. Јас сум задоволен што и припаѓам на ДУИ. Имаме една земја и за оваа земја треба да работиме сите и во Демократската унија за интеграција сите треба да придонесат“, рече Дураку по завршувањето на партиската прослава од 17-годишнината на ДУИ.
Тој не одговори дали доброволно би се повлекол од министерството за животна средина, а лидерот на ДУИ, Али Ахмети ги изигнорира новинарските екипи и не застана да одговори на новинарски прашања. Во дел од обраќањето пред присутните функционери и членови на ДУИ, Ахмети се осврна на „бомбите“ од Ел Чека. Рече дека не ги слушал и ги повика органите на прогонот да постапат за нелегалните снимки, кои, како што рече биле злоупотребени.
Г.Н.Р