Собраниската Комисија за прашања на изборите и именувањата ги донесе решенијата за стекнување на работен однос на 123 пратеници, иако опозицијата не ги прифаќа мандатите велејќи дека се насилно верификувани, по што поднесе тужба против Собранието.
Пратеничката на ВМРО-ДПМНЕ Силвана Бонева повикувајќи се на членот 63 од Уставот, вели дека мандатот на пратениците го верификува Собранието и тој започнува да тече од 10. мај.
– По 10 мај имаме спорна ситуација од страна на опозицијата. Според член 65 од Уставот, пратеникот ја поднесува оставката лично на седница на Собранието. Ако колегите од СДСМ не сакаат да ја бидат пратеници и сакаат да го вратат мандатот, тоа мора да го сторат во Собранието, за да може да се смета дека не се членови на законодавниот дом. Поднесување оставка пред нотар за мандат кој ви го дале граѓаните не постои – изјави Бонева.
Во однос на барањето за апанажа на пратениците од минатиот состав на Собранието, Комисијата едногласно донесе одлука за прифаќање на 24 барања, а за уште седум ќе се расправа на следната седница на Комисијата.
Петар Клинчарски