Пратеникот од редовите на СДСМ, Стефан Богоев денеска во изјава за медиумите рече дека загадувањето во општина Карпош достигнало драматични размери, а освен ПМ честички во воздухот имало и големо количество арсен.
– Присуството на канцерогената супстанца арсен во воздухот, на моменти изнесувала и 14 нанограми на метар кубен што е двојно повеќе од пропишаната граница од 6 нанограми на метар кубен. Тоа е огромно количество отров што жителите на Карпош го вдишуваат. Додека граѓаните на Карпош дишат опасен воздух кој и не е доволно испитан, локалната власт предводена од Стевче Јакимовски и ВМРО-ДПМНЕ со години го игнорираат овој огромен проблем во општината. Граѓаните на Карпош се оставени сами на себе да се борат против загадувањето и сами да ги лоцираат и пријавуваат загадувачите, без никаква помош од локалната власт, рече Богоев.
Тој додаде дека состојбата со енормното загадување е алармантна и дека загадениот воздух без исклучок е закана по здравјето на сите граѓани кои живеат и работат на територијата на општината.
– Затоа, по победата на изборите планираме попис на целото зеленило на територија на општина Карпош и негова заштита, изградба на нови паркови и зелени површини секаде онаму каде што е изводливо, како и иницијатива за формирање на Еко полиција во соработка со извршната власт. На овој начин ќе се заштити и унапреди постоечкото зеленило и ќе се лоцираат и казнат загадувачите. Гарантираме чист воздух и поголеми зелени површини за сите граѓани на Карпош, рече Богоев.
