Според градоначалничката на Тетово, Теута Арифи, расчистувањето на тетовската депонија е веќе започнато, а сметот се носи во трансфер-центар. Како што рече таа, за остатоците во депонијата градот имал потреба од владина помош.
– Јас уште во девет утрината извршив инспекција со мојот тим, веќе е започнато расчистувањето на депонијата според планот и процедурите. Се работи за долгорочен проблем кој постои повеќе од 15 години и затоа ни е јасно и дека решенијата треба да бидат долгорочни. Направивме центар за трансфер кој веќе е во употреба, комунален смет на депонијата веќе не се фрла три или четири недели, а за остатоците ни требаше екстра помош, а не да ги носиме од едно на друго место бидејќи тоа не е решение. Во рамките на ребалансот на буџетот прифатено е Владата да интервенира во ова финално чистење. Ние не баравме помош, со наши можности ги правевме решенијата, но сега ни треба помош во финалната фаза – рече Арифи.
Во изјава за „А1он“ таа додаде дека компаниите што расчистуваат сега го носат сметот во „Дрисла“ и „Русино“.
Ние ги користиме тие депонии, Тетово не треба да има депонија, само ќе функционира трансфер-центарот, рече Арифи и додаде дека претходните градски власти за депонијата воопшто не барале решенија.
– Јас во Општината најдов куп долгови, но ниту едно решение за депонијата. Ние моравме да најдеме среднорочни и долгорочни решенија. Јас не го водам градот политички, туку сум ориентиран кон решавање на проблемите на граѓаните, вели Арифи и додаде дека и таа живее тука заедно со своето семејство, и дека ѝ пречело загадувањето.
– Граѓаните на Тетово може да се потсетат како било пред четири години. Ние бараме други цивилизациски решенија, без разлика колку и да се тешки бидејќи само тие се гаранција дека може да се оди напред – истакна Арифи.
На прашањето дали ќе се кандидира повторно за градоначалник, Арифи вели дека тоа е одлука што ја носат партиските органи, но додава дека нејзиното срце е во Тетово и дека живее за својот град.
Кристијан Ландов