По состанокот на дипломатите во земјава со претседателот на ДУИ, Али Ахмети изјавија дека како партија делат одговорност за актуелната безбедносна и политичка ситуација.
Италијанскиот амбасадор во име на останатите дипломати порача дека ДУИ мора да заземе став по прашањето на аферата со прислушувани разговори кои ја отвори СДСМ но и да придонесе да се истражи нивната содржина и сериозните обвинувања од опозицијата за низа прекршувања на законските прописи од страна на владини функционери.
„Ја поздравуваме конструктивната улога на ДУИ за време на викендот,вклучувајќи го и учеството во советот за безбедност.
Се надеваме дека ДУИ ќе продолжи на истиот конструктивен начин да соработува со сите страни и институции.
Како членови на коалиционата влада, ДУИ ја дели одговорноста за напредокот на демократските вредности и принципи.
Оттука партијата има обврска да помогне во јакнењето на институциите во земјата и да обезбеди неправилностите кои што се откриени од аферата целосно да се истражат на транспарентен и веродостоен начин.
Сега повеќе откога и да е се надеваме дека ДУИ ќе заземе став и ќе го искористи своето влијание за доброто и иднината на сите жители на Република Македонија“, изјави италијанскиот амбасадор Масимо Белели.
Б.С.